LEIÐSÖGUMENN ERU ANDLIT ÞJÓÐARINNAR

skrifað 21. feb 2014
hópmynd EHI 2013_hringferð um landið

Í dag föstudaginn 21. febrúar er alþjóðadagur leiðsögumanna og þess minnast leiðsögumenn víða um heim. Samkvæmt skilgreiningu á hlutverki leiðsögumanns hjá Alþjóðasambandi leiðsögufélaga og Evrópusamtaka þeirra er það sem hér segir: „Leiðsögumaður ferðamanna miðlar staðbundnum fróðleik um menningu og náttúrufar til gesta, oftast á þeirra eigin tungumáli og hefur til þess rétttindi af þar til bærum yfirvöldum“ Félag leiðsögumanna tilheyrir Norðurlandasamtökum þeirra auk Evrópusamtakanna og auk kjarabaráttu hefur eitt helsta baráttumál þess verið að félagsmenn þess öðlist löggildingu til þess að stunda starf sitt í samræmi við alþjóðlega skilgreiningu á starfinu. Fram til þessa hefur baráttan fyrir löggildingu ekki borið árangur hér á landi. Þeir sem hafa stundað nám og lokið öllum prófum frá Leiðsöguskóla Íslands í Kópavogi eða Endurmenntun Háskólans og nú í vor hjá Símenntun Háskólans á Akureyri geta orðið fullgildir félagar í Félagi leiðsögumanna, aðrir ekki. Námið er yfirgripsmikið og tekið á fjölmörgum þáttum varðandi náttúru og menningu landsins auk daglegs lífs Íslendinga. Innan okkar raða eru leiðsögumenn með réttindi á mjög mörgum tungumálum. Aukning er hinsvegar á framandi málum.

Ferðaþjónustan eru sú atvinnugrein á Íslandi sem vex hvað hraðast, og eru það sífellt fleiri hér á landi sem stunda leiðsögustörf. Félag leiðsögumanna fagnaði 40 ár afmæli sínu fyrir 2 árum, og frá stofnun þess 6. Júní árið 1972 hafa orðið miklar breytingar í íslenskri ferðaþjónustu, ekki hvað síst á síðustu árum. Innan raða Félags leiðsögumanna eru nú á sjötta hundrað manns og hafa sífellt fleiri starfið sem aðalatvinnu, eða tæplega 100 manns. Eðli málsins samkvæmt er mest um að vera hjá leiðsögumönnum á sumrin en með vaxandi vetrarferðamennsku eru margir þeirra líka önnun kafnir yfir vetrarmánuðina. Í vetur hafa t.d. þúsundir erlendra ferðamanna lagt leið sína hingað til lands til að líta augum norðurljósin. Þessa dagana eru hundruð breskra skólanemenda hér á landi í námsferðum, auk skólanema frá öðrum löndum. Hverjum hópi fylgir íslenskur leiðsögumaður auk bílstjóra. Þessir hópar staldra hér við frá 2- 3 dögum og upp í viku, og heimsækja nokkra af vinsælustu ferðamannastöðunum, auk þess að skoða sig um í höfuðborginni. Til Íslands komu á síðasta ári rösklega 781 þúsund um Leifsstöð, auk þeirra sem flugu beint til annarra staða á landinu eða komu með skipum. Heildarfjöldinn hingað til lands var því meira en 900 þúsund ferðamenn og fjölgaði um rösklega 20%. Í ár má jafnvel búast við allt að einni milljón ferðamanna hingað til lands þegar allt er talið. Þessi mikli fjöldi kallar á meira eftirlit og umhyggju á ferðamannastöðum, og þar koma vel menntaðir og reyndir leiðsögumenn við sögu á hverjum degi. Við erum andlit þjóðarinnar út á við því leiðsögumenn hafa mest persónulegt samband við ferðahópa sem koma hingað til lands. Með velmenntuðum og löggildum leiðsögumönnum getum við tekið á móti þessum fjölda með sóma! Einkunnarorð okkar leiðsögumanna eru : „Landinu virðing- Lífinu hlýja“ og með þeim orðum óskum við landsmönnum öllum farsældar á ferð um landið, allan ársins hring.

Örvar Már Kristinsson Formaður Félags leiðsögumanna