Samtök ferðaþjónustunnar mótmæla gjaldtöku við Geysi

skrifað 29. okt 2013
images ferðamenn
Samtök ferðaþjónustunnar mótmæla harðlega áformum landeigendafélags Geysis að hefja innheimtu gjalds á Geysissvæðinu á næsta ári.

Samtök ferðaþjónustunnar hafa lýst sig reiðubúin til viðræðna við stjórnvöld um hugmyndir að útfærslu á náttúrupassa sem staðið geti undir viðhaldi og uppbyggingu ferðamannastaða. Stjórnvöld eru nú með til skoðunar mögulegar útfærslur á náttúrupassa og því skýtur það skökku við að landeigendur, á einum helsta ferðamannastað landsins, skuli tilkynna gjaldtöku á sama tíma og slík skoðun stendur yfir. Gera má ráð fyrir að Geysissvæðið, rétt eins og aðrir ferðamannastaðir, geti sótt fjármagn til uppbyggingar í sjóðinn og því væri það ótækt að ferðamenn þurfi auk náttúrupassans að greiða inn á helstu ferðamannastaði.  Þess ber að geta að ríkið á 35% í Geysissvæðinu og er ríkið þá komið í tvöfalda innheimtu á þessu svæði. 

Þessi frétt er á heimasíðu [Samtaka ferðaþjónustunnar](http://www.saf.is/gjaldtoku-motmaelt/)